बुलढाणा (बुलडाणा कव्हरेज न्युज) : बुलढाणा जिल्ह्यातील विविध पोलीस ठाण्यांच्या हद्दीत गेल्या दोन दिवसांत पोलिसांनी विविध गुन्ह्यांमध्ये कारवाई केली आहे. मलकापूर शहरातील नालंदा नगर परिसरात शिक्षकाच्या बंद घराचा कडी-कोयंडा तोडून अज्ञात चोरट्यांनी चांदीचे दागिने आणि रोख रक्कम असा एकूण ४९ हजार रुपयांचा मुद्देमाल लंपास केला. यासोबतच मद्यधुंद अवस्थेत वाहन चालविणाऱ्या चौघांविरुद्ध गुन्हे दाखल करण्यात आले असून, अवैध हातभट्टी दारू आणि वरली-मटका जुगारावरही पोलिसांनी कारवाई केली आहे. दरम्यान, दोन व्यक्ती बेपत्ता झाल्याच्या नोंदी संबंधित पोलीस ठाण्यांत करण्यात आल्या आहेत.
मलकापूरात शिक्षकाच्या घरात चोरट्यांचा डल्ला….
मलकापूर शहरातील नालंदा नगर परिसरात राहणारे शिक्षक सिद्धार्थ देवचंद झणके हे कुटुंबासह भुसावळ येथे गेले असताना अज्ञात चोरट्यांनी त्यांच्या घराला लक्ष्य केले. चोरट्यांनी मुख्य दरवाजाचा लोखंडी कडी-कोयंडा कापून तसेच चैनल गेट तोडून घरात प्रवेश केला.
घरातील हॉल आणि बेडरूममधील कपाटे तसेच सोफ्याची झडती घेत चोरट्यांनी दोन चांदीचे हार, दोन जोड पैंजण आणि १२ हजार रुपये रोख, असा एकूण ४९ हजार रुपयांचा मुद्देमाल चोरून नेला. शेजारील घरातही चोरीचा प्रयत्न झाल्याचे तक्रारीत नमूद करण्यात आले आहे. याप्रकरणी मलकापूर शहर पोलिसांनी गुन्हा दाखल करून अज्ञात चोरट्यांचा शोध सुरू केला आहे.
मद्यधुंद वाहनचालकांवर पोलिसांचा दणका….
मलकापूर शहरातील तहसील चौक परिसरात वाहतूक तपासणीदरम्यान राजू रामभाऊ वाकोडे आणि गणेश भिकाजी पाखरे हे दोघे मद्याच्या अमलाखाली वाहन चालविताना आढळून आले. वैद्यकीय तपासणी केल्यानंतर दोघेही मद्याच्या अमलाखाली असल्याचे निष्पन्न झाले. त्यांच्याविरुद्ध कलम १८५ मोटार वाहन कायद्यानुसार स्वतंत्र गुन्हे दाखल करण्यात आले.
दरम्यान, धाड येथील छत्रपती शिवाजी महाराज चौकात पेट्रोलिंगदरम्यान ईश्वर किशोर ससाणे आणि सुखदेव भाऊराव पाडळे हे मोटारसायकल वेडीवाकडी व निष्काळजीपणे चालविताना आढळले. तपासणीत दोघेही मद्याच्या अमलाखाली असल्याचे निष्पन्न झाल्याने त्यांच्याविरुद्ध कलम १८४ व १८५ मोटार वाहन कायद्यानुसार कारवाई करण्यात आली.
हातभट्टी दारूवर दोन ठिकाणी कारवाई….
दसरखेडे-मलकापूर पोलिसांनी ग्राम भानगुरा येथे कारवाई करत शांताराम ओंकार चव्हाण याच्या ताब्यातून सहा लिटर हातभट्टी दारू आणि प्लास्टिक कॅन असा ६५० रुपयांचा मुद्देमाल जप्त केला.
तर धामणगाव बढे पोलिसांनी उबाळखेड येथे दीपक सुपडा जारे याच्याकडून १५ लिटर हातभट्टी दारू आणि कॅन असा १ हजार ६०० रुपयांचा मुद्देमाल जप्त केला. दोन्ही प्रकरणांत महाराष्ट्र दारूबंदी कायद्यानुसार गुन्हे दाखल करण्यात आले आहेत.
सैलानी परिसरात वरली-मटका जुगारावर छापे….
रायपूर पोलिसांनी सैलानी परिसरात वरली-मटका जुगाराविरुद्ध दोन स्वतंत्र कारवाया केल्या. एका कारवाईत १ हजार २०० रुपये रोख, तर दुसऱ्या कारवाईत दोन आरोपींकडून ६ हजार ३१० रुपये रोख आणि जुगाराचे साहित्य जप्त करण्यात आले.
या प्रकरणी संबंधित आरोपींविरुद्ध कलम १२ (अ) महाराष्ट्र जुगार प्रतिबंधक कायद्यानुसार गुन्हे दाखल करण्यात आले आहेत.
दोन व्यक्ती बेपत्ता; पोलिसांकडून शोध सुरू…
दरम्यान, सोनाळा पोलीस ठाण्यात रेखा सुरेश तिवारी (वय ३५) या महिलेची मिसिंग नोंद करण्यात आली आहे. रेखा या पिंगळी जहागीर येथून शौचालयास जाते असे सांगून घराबाहेर पडल्या; मात्र त्यानंतर त्या घरी परतल्या नाहीत.
तसेच मलकापूर शहर पोलीस ठाण्यात अमित सदाशिव माळी (वय ३८) यांचीही मिसिंग नोंद करण्यात आली आहे. अमित हे शेतीचे पैसे घेण्यासाठी नांदुरा येथे जात असल्याचे सांगून २८ ऑगस्ट रोजी घरातून बाहेर पडले होते. त्यानंतर ते परत न आल्याने कुटुंबीयांनी पोलिसांत नोंद केली आहे.
जिल्ह्यातील या सर्व प्रकरणांचा संबंधित पोलीस ठाण्यांकडून तपास सुरू असून, घरफोडीतील अज्ञात चोरट्यांचा शोध घेण्यासाठी पोलिसांकडून परिसरातील माहिती आणि उपलब्ध पुराव्यांच्या आधारे तपास केला जात आहे.
