खामगाव (बुलडाणा कव्हरेज न्युज) : पैशांची मागणी करून विवाहितेला मारहाण करणे, शारीरिक व मानसिक त्रास देणे तसेच तिला घराबाहेर काढल्याच्या आरोपावरून खामगाव ग्रामीण पोलिसांनी पतीसह सासरच्या सात जणांविरुद्ध गुन्हा दाखल केला आहे. शेगाव आणि पुणे येथे हा प्रकार घडल्याचे विवाहितेने दिलेल्या तक्रारीत नमूद केले आहे.
या प्रकरणातील फिर्यादी सौ. दिव्या रामेश्वर डोंगरे (वय २४, रा. हडपसर, पुणे, ह. मु. शेलोडी, ता. खामगाव) यांनी खामगाव ग्रामीण पोलीस ठाण्यात तक्रार दिली. त्यांच्या तक्रारीनुसार, पती रामेश्वर जयराम डोंगरे, सासरे जयराम हरीभाऊ डोंगरे, सासू यमुना जयराम डोंगरे, जेठ बालू जयराम डोंगरे, दीर विनोद जयराम डोंगरे, नणंद अनिता तायडे आणि जेठानी शिल्पा बालू डोंगरे (सर्व रा. शेगाव) यांनी संगनमत करून पैशांची मागणी केल्याचा आरोप आहे.
फिर्यादीने पैशांची मागणी पूर्ण न केल्यामुळे आरोपींनी तिला मारहाण करून शारीरिक व मानसिक त्रास दिला, तसेच घराबाहेर काढल्याचे तक्रारीत म्हटले आहे. २८ जुलै २०१५ पूर्वीपासून हा प्रकार सुरू असल्याचेही फिर्यादीने नमूद केले आहे. या आरोपांमुळे संबंधितांविरुद्ध पोलिसांत तक्रार दाखल करण्यात आली.
या प्रकरणी खामगाव ग्रामीण पोलिसांनी कायमस्वरूपी अप क्रमांक ३९४/२०२६ नुसार भारतीय न्याय संहितेच्या कलम ८५, ११५(२) आणि ३(५) अन्वये सात जणांविरुद्ध गुन्हा दाखल केला आहे. या प्रकरणाचा पुढील तपास खामगाव ग्रामीण पोलीस करीत आहेत.
