खामगाव (बुलडाणा कव्हरेज न्युज): तालुक्यातील एका गावातील २२ वर्षीय तरुणी अचानक बेपत्ता झाल्याची धक्कादायक घटना समोर आली आहे. विशेष म्हणजे, ती घरातून निघताना स्वतःची शैक्षणिक कागदपत्रे, घरातील सोन्याची पोत आणि तब्बल ९० हजार रुपयांची रोकड सोबत घेऊन गेल्याचे उघड झाल्याने या प्रकरणाने वेगळेच वळण घेतले आहे. या घटनेमुळे कुटुंबीय चिंतेत असून परिसरातही विविध चर्चांना उधाण आले आहे.
मिळालेल्या माहितीनुसार, संबंधित तरुणी २२ जून रोजी सकाळी सुमारे ११ वाजताच्या सुमारास घरातून कोणालाही काहीही न सांगता बाहेर पडली. बराच वेळ उलटूनही ती घरी परतली नाही. तिचा मोबाईल तसेच इतर मार्गांनी संपर्क करण्याचा प्रयत्न निष्फळ ठरल्यानंतर कुटुंबीयांनी नातेवाईक, मित्रपरिवार आणि परिसरात तिचा शोध घेतला. मात्र, तिचा कोणताही ठावठिकाणा लागला नाही.
शोधादरम्यान घरातील वस्तूंची पाहणी केली असता आणखी एक धक्कादायक बाब समोर आली. तरुणी घरातील महत्त्वाची शैक्षणिक कागदपत्रे, सोन्याची पोत आणि सुमारे ९० हजार रुपयांची रोकड सोबत घेऊन गेल्याचे निदर्शनास आले. त्यामुळे तिच्या अचानक बेपत्ता होण्यामागील कारणाबाबत अनेक तर्क-वितर्क व्यक्त केले जात आहेत.
कुटुंबीयांनी दिलेल्या तक्रारीत संबंधित तरुणी एका युवकासोबत निघून गेल्याचा संशय व्यक्त केला आहे. या संशयाच्या अनुषंगाने पोलिसांनी विविध शक्यतांचा तपास सुरू केला असून, संबंधित युवकाचाही शोध घेतला जात आहे.
याप्रकरणी खामगाव ग्रामीण पोलिस ठाण्यात हरवल्याची नोंद करण्यात आली आहे. पोलिसांकडून तरुणीचा शोध घेण्यासाठी प्रयत्न सुरू असून, तिचा ठावठिकाणा लागल्यानंतरच या संपूर्ण प्रकरणामागील सत्य समोर येणार आहे.
