देऊळगाव राजा (बुलडाणा कव्हरेज न्युज):शहरातील शिवाजी शाळेच्या गेटसमोर सायंकाळच्या वेळेस अल्पवयीन मुलावर धारदार चाकूने हल्ला झाल्याची धक्कादायक घटना ६ जानेवारी रोजी घडली. या घटनेमुळे संपूर्ण देऊळगाव राजा परिसरात एकच खळबळ उडाली असून, शाळेच्या आवारातच रक्त सांडल्याने पालकांमध्ये भीतीचे वातावरण पसरले आहे.
मिळालेल्या माहितीनुसार, फिर्यादी ऋषिकेश सखाराम विधाते (वय १५, रा. संजयनगर) हा शाळेतून घरी जात असताना शिवाजी शाळेच्या गेटजवळ त्याचा चुलत भाऊ शुभम कुंडलिक विधाते (वय १६) याच्यावर राहुल दीपक पिंपळे (रा. लालबाग, राजीव गांधी नगर, जालना) याने अचानक धारदार चाकूने हल्ला केल्याचा आरोप आहे. या हल्ल्यात शुभम गंभीर जखमी झाला असून त्याला तातडीने रुग्णालयात दाखल करण्यात आले आहे.
घटनेची माहिती मिळताच देऊळगाव राजा पोलिसांनी घटनास्थळी धाव घेत पंचनामा केला. फिर्यादीच्या तोंडी तक्रारीवरून रात्री १०.३५ वाजता गुन्हा दाखल करण्यात आला आहे. सदर गुन्हा पोलीस हेड कॉन्स्टेबल गणेश जायभाये यांनी नोंदविला असून, पोलीस निरीक्षक ब्रम्हागिरी यांच्या मार्गदर्शनाखाली पोलीस उपनिरीक्षक राजकुमार कांबळे पुढील तपास करत आहेत.
दरम्यान, आरोपीला अटक करण्यात आली आहे की नाही, तसेच हल्ल्यामागचे नेमके कारण काय…याबाबत पोलिसांकडून अधिकृत माहिती देण्यात आलेली नाही. शाळेच्या परिसरात अल्पवयीन मुलांवर अशा प्रकारची हिंसक घटना घडल्याने नागरिकांनी संताप व्यक्त केला असून, विद्यार्थ्यांच्या सुरक्षेबाबत गंभीर प्रश्न उपस्थित होत आहेत.
