बुलढाणा (बुलडाणा कव्हरेज न्युज): मलकापूर ग्रामीण पोलिस ठाण्याच्या हद्दीत शेतातील घरात घुसून शेतमजूर महिलेवर सामूहिक अत्याचार केल्याच्या तसेच जबरी चोरीच्या गंभीर प्रकरणात अटक करण्यात आलेल्या दोन्ही आरोपींची पोलीस कोठडी २९ ऑगस्ट रोजी संपणार आहे. त्यामुळे दोन्ही आरोपींना पुन्हा न्यायालयासमोर हजर करण्यात येणार असून, तपासातील पुढील कार्यवाहीसाठी पोलिसांकडून कोठडी वाढवून देण्याची मागणी होण्याची शक्यता आहे.
शेतातील घरात घुसून दाम्पत्याला मारहाण….
ही धक्कादायक घटना १७ जुलैच्या रात्री मलकापूर ग्रामीण पोलिस ठाण्याच्या हद्दीतील एका शेतातील घरात घडली होती. दोन आरोपींनी घरात प्रवेश करून शेतमजूर दाम्पत्याला मारहाण केल्याचा आरोप आहे. त्यानंतर महिलेवर अत्याचार करण्यात आल्याचे तक्रारीत नमूद आहे.
एवढेच नव्हे, तर आरोपींनी घरातील सोन्याचे दागिने, भ्रमणध्वनी आणि सहा हजार रुपयांची रोकड जबरीने घेऊन पोबारा केल्याचा आरोप आहे. या घटनेनंतर पीडित महिलेने दिलेल्या तक्रारीवरून पोलिसांनी अत्याचार, जबरी चोरीसह विविध कलमांन्वये गुन्हा दाखल केला होता.
चेहरा नव्हता, थेट धागाही नव्हता!
घटनास्थळी आरोपींची ओळख पटविणारा कोणताही थेट पुरावा पोलिसांच्या हाती नव्हता. त्यामुळे या प्रकरणाचा तपास पोलिसांसाठी मोठे आव्हान ठरला होता. मात्र पोलिसांनी हार न मानता तांत्रिक नोंदी, संशयितांच्या हालचाली, गोपनीय माहिती आणि वैज्ञानिक तपास यांची सांगड घालत तपासाला दिशा दिली.
तपासादरम्यान संशयितांचे डीएनए नमुने घेऊन ते तपासणीसाठी पाठविण्यात आले आहेत. या नमुन्यांची तुलना प्रकरणातील पुराव्यांशी केली जाणार असून, त्यातून तपासाला महत्त्वाचा दुवा मिळण्याची शक्यता आहे.
तब्बल ४० दिवसांच्या तपासानंतर दोघे जेरबंद…
पोलीस अधीक्षक नीलेश तांबे यांच्या मार्गदर्शनाखाली पोलिसांनी जवळपास ४० दिवस या प्रकरणाचा कसून तपास केला. तांत्रिक तपास आणि गोपनीय माहितीच्या आधारे पोलिसांनी संशयितांचा माग काढला.
अखेर २६ ऑगस्ट रोजी मध्य प्रदेशातील बऱ्हाणपूर जिल्ह्यातील जामठी येथून दोन्ही आरोपींना अटक करण्यात पोलिसांना यश आले. अटकेनंतर त्यांना न्यायालयासमोर हजर करण्यात आले होते. न्यायालयाने त्यांना पोलीस कोठडी सुनावली होती.
आता तपासाची पुढची दिशा काय?
दोन्ही आरोपींची पोलीस कोठडी २९ ऑगस्ट रोजी संपत असल्याने त्यांना पुन्हा न्यायालयात हजर केले जाणार आहे. प्रकरणातील वैज्ञानिक पुरावे, डीएनए तपासणी, चोरीला गेलेल्या मुद्देमालाचा शोध तसेच घटनेशी संबंधित इतर बाबींचा तपास पूर्ण करण्यासाठी पोलिसांकडून पुढील पोलीस कोठडीची मागणी केली जाण्याची शक्यता आहे.
या प्रकरणातील वैज्ञानिक तपासाचे अहवाल आणि इतर पुरावे आरोपींविरोधातील तपासाला कितपत बळकटी देतात, याकडे आता लक्ष लागले आहे.
