धाड (बुलडाणा कव्हरेज न्युज): छत्रपती संभाजीनगरकडून धाडकडे येणाऱ्या राज्य परिवहन महामंडळाच्या एसटी बसखाली दुचाकी चिरडली जाऊन तिघांचा घटनास्थळीच मृत्यू झाल्याची भीषण दुर्घटना आज रविवार, ५ जानेवारी रोजी सायंकाळी सुमारे ४.५० वाजताच्या सुमारास करडी (धाड) येथील पुलावर घडली. अपघाताची तीव्रता इतकी प्रचंड होती की दुचाकीचा अक्षरशः चुराडा झाला.
मलकापूर आगाराची एसटी बस क्रमांक MH-06-BW-3638 ही छत्रपती संभाजीनगरहून मलकापूरकडे जात होती. त्याचवेळी ढालसावंगी (ता. बुलढाणा) येथील अंकुश पाडळे, रवी चंदनशे व कैलास शिंदे हे तिघे दुचाकीवरून धाडहून करडीच्या दिशेने जात असताना करडी (धाड) पुलावर एसटी बस व दुचाकीची समोरासमोर जोरदार धडक झाली. या धडकेत दुचाकी थेट बसखाली अडकली.
या भीषण अपघातात तिन्ही दुचाकीस्वारांना गंभीर दुखापत होऊन त्यांचा घटनास्थळीच मृत्यू झाला. अपघातानंतर परिसरात काही काळ तणावाचे वातावरण निर्माण झाले होते.
घटनेची माहिती मिळताच नागरिकांनी घटनास्थळी मोठी गर्दी केली.
या दुर्दैवी घटनेमुळे ढालसावंगी गावावर शोककळा पसरली आहे. पोलिसांनी तत्काळ घटनास्थळी धाव घेऊन पंचनामा केला असून पुढील तपास सुरू आहे.
