मलकापूर :(बुलडाणा कव्हरेज न्युज)धुपेश्वरकडे जात असताना चारचाकी वाहनावरील नियंत्रण सुटल्याने गाडी रस्त्याच्या कडेला असलेल्या झाडावर आदळून भीषण अपघात झाला. या अपघातात मलकापूर शहरातील तीन युवकांचा जागीच मृत्यू झाला असून दोन जण गंभीर जखमी झाले आहेत. ही घटना धरणगाव–धुपेश्वर रोडवर धरणगाव नजीक २१ डिसेंबर रोजी दुपारी साडेतीनच्या सुमारास घडली.
मिळालेल्या माहितीनुसार, मलकापूर शहरातील पाच युवक मारुती अर्टीका (क्रमांक MH 12 JC 7508) या चारचाकी वाहनातून धुपेश्वरकडे जात होते. दरम्यान चालकाचे वाहनावरील नियंत्रण सुटल्याने गाडी थेट रस्त्याच्या बाजूला असलेल्या झाडावर आदळली. अपघाताची तीव्रता इतकी होती की वाहनाचा मोठ्या प्रमाणात चक्काचूर झाला.
या अपघातात रुद्र उमेश पवार (वय ११, रा. सावजी फैल), विनायक जनार्धन अत्तरकार (वय २०, रा. लक्ष्मीनगर) व गणेश दीपक इंगळे यांचा घटनास्थळीच मृत्यू झाला. तर प्रशांत राजू वनारे व तक्ष धुरंधर हे दोघे गंभीर जखमी झाले आहेत.
घटनेची माहिती मिळताच परिसरातील नागरिकांनी घटनास्थळी धाव घेतली. मलकापूर शहर पोलीस ठाण्याचे पोलीस निरीक्षक गणेश गिरी हे पोलीस ताफ्यासह घटनास्थळी दाखल झाले. जखमींना पोलिस व स्थानिकांच्या मदतीने तातडीने मलकापूर येथील रुग्णालयात उपचारासाठी दाखल करण्यात आले.
एकीकडे मलकापूर नगरपरिषद निवडणुकीच्या निकालाची चर्चा सुरू असतानाच घडलेल्या या दुर्दैवी घटनेमुळे संपूर्ण शहरात शोककळा पसरली असून सर्वत्र हळहळ व्यक्त केली जात आहे.
