अंढेरा (बुलडाणा कव्हरेज न्युज) : मेहकर येथील आयटीआयमध्ये कार्यरत असलेल्या ५६ वर्षीय शिक्षकाच्या मृत्यूप्रकरणी कौटुंबिक त्रास दिल्याचा आरोप करण्यात आला आहे. या प्रकरणी मृत शिक्षकाच्या पहिल्या पत्नीने दिलेल्या तक्रारीवरून अंढेरा पोलिसांनी दुसऱ्या पत्नीसह सहा जणांविरुद्ध गुन्हा दाखल केला आहे. गजानन विठोबा वाघमारे असे मृत शिक्षकाचे नाव असून, या घटनेमुळे परिसरात खळबळ उडाली आहे.
गजानन वाघमारे हे मेहकर येथील एका आयटीआयमध्ये शिक्षक म्हणून कार्यरत होते. चिखली तालुक्यातील कवठळ शिवारात त्यांची १६ एकर शेती आहे. २१ ऑक्टोबर रोजी ते शेतात गेले होते. मात्र, बराच वेळ होऊनही ते घरी परतले नाहीत. त्यामुळे कुटुंबीयांनी त्यांच्याशी संपर्क साधण्याचा प्रयत्न केला. त्यांचा मोबाईल फोन लागत असतानाही ते घरी परतले नसल्याने कुटुंबीयांची चिंता वाढली होती.
दरम्यान, कवठळ शिवारातील शेतात आंब्याच्या झाडाला गळफास घेतलेल्या अवस्थेत गजानन वाघमारे आढळून आले. या घटनेनंतर त्यांच्या मृत्यूमागील कारणाबाबत प्रश्न उपस्थित झाले. कौटुंबिक त्रासाला कंटाळून त्यांनी हे टोकाचे पाऊल उचलल्याचा आरोप त्यांच्या पहिल्या पत्नीने तक्रारीत केला आहे.
गजानन वाघमारे यांचा पहिला विवाह लोणार तालुक्यातील एका महिलेशी झाला होता. त्यांना एक मुलगी आहे. त्यानंतर त्यांनी मेरा बुद्रुक येथील एका महिलेशी दुसरा विवाह केला. दुसऱ्या पत्नीपासून त्यांना एक मुलगा आहे. या कौटुंबिक पार्श्वभूमीच्या अनुषंगाने पहिल्या पत्नीने दिलेल्या तक्रारीवरून पोलिसांनी तपास सुरू केला आहे.
मृताची पहिली पत्नी वंदना गजानन वाघमारे (वय ४८) यांच्या तक्रारीवरून नीता गजानन वाघमारे, प्रकाश पांडुरंग पडघान, शोभा प्रकाश पडघान, नंदू पांडुरंग पडघान, रामेश्वर रिंढे आणि हरिभाऊ वायाळ अशा सहा जणांविरुद्ध अंढेरा पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास अंढेरा पोलीस ठाण्याचे पोलीस उपनिरीक्षक दिनेश घुगे करीत आहेत. तक्रारीतील आरोपांची सत्यता तपासानंतर स्पष्ट होणार आहे.
