रायपुर (बुलडाणा कव्हरेज न्युज): रायपूर पोलीस ठाण्याच्या हद्दीतील खोर गावात जुन्या वैमनस्यातून एकाला रस्त्यावर थांबवून डोक्यात सुरा मारल्याची धक्कादायक घटना घडली.
या प्रकरणी दोघांविरुद्ध पोलिसांनी गुन्हा दाखल केला आहे. ही घटना नुकतीच घडली असून, प्रेमराज अशोक नरवाडे (वय २७, रा. खोर) असे जखमी युवकाचे नाव आहे. तो महिला व बालविकास विभागात निरीक्षक म्हणून कार्यरत आहे.
प्रेमराज आणि त्याचा चुलत पुतण्या राहुल सुनील नरवाडे यांच्यात जुना वाद होता. याशिवाय, राहुल याचे हतेडी गावातील एका मुलीसोबत प्रेमसंबंध असल्याचेही समजते. घटनेच्या दिवशी प्रेमराज दुचाकीवरून हतेडी येथून खोर गावाकडे जात असताना आरोपींनी त्याला घराजवळ अडवले. कोणतीही चर्चा न करता राहुल नरवाडे याने अचानक त्याच्या डोक्यात सुरा मारला. या हल्ल्यात प्रेमराज गंभीर जखमी झाला असून त्याच्यावर उपचार सुरू आहेत.
या प्रकरणी पोलिसांनी राहुल नरवाडे याच्यासह एकावर गुन्हा दाखल केला असून अधिक तपास सुरू आहे.
