देऊळगाव राजा (बुलडाणा कव्हरेज न्युज) : पेट्रोल भरण्यासाठी जात असलेल्या दुचाकीला अज्ञात वाहनाने जोरदार धडक दिल्याने एका युवकाचा जागीच मृत्यू झाला, तर त्याचा मित्र जखमी झाला. ही घटना देऊळगाव मही–चिखली मार्गावरील एका पेट्रोल पंपाजवळ १९ डिसेंबर २०२५ रोजी सायंकाळी साडेचारच्या सुमारास घडली.
विकास रोडीबा बनकर असे अपघातात मृत्यू झालेल्या युवकाचे नाव आहे. याप्रकरणी कडुबा प्रल्हाद डोईफोडे (वय ५६, व्यवसाय शेती, रा. डोलखेडा खुर्द, ता. जाफाबाद, जि. जालना) यांनी देऊळगाव राजा पोलीस ठाण्यात फिर्याद दिली आहे.
फिर्यादी कडुबा डोईफोडे आणि त्यांचे मित्र विकास बनकर हे मोटारसायकल क्रमांक MH-14-GK-8864 वरून देऊळगाव मही ते चिखली मार्गावरील पेट्रोल पंपावर पेट्रोल भरण्यासाठी जात असताना अज्ञात वाहनाने त्यांच्या दुचाकीस जोरदार धडक दिली. या अपघातात कडुबा डोईफोडे किरकोळ जखमी झाले, तर विकास बनकर यांचा जागीच मृत्यू झाला.
या घटनेप्रकरणी देऊळगाव राजा पोलीस ठाण्यात अज्ञात वाहन चालकाविरुद्ध भारतीय न्याय संहिता (BNS) कलम २८१, १२५(अ), १०६(१) तसेच मोटार वाहन कायदा कलम १३४ अंतर्गत गुन्हा दाखल करण्यात आला आहे. पुढील तपास ठाणेदार ब्रम्हागिरी यांच्या मार्गदर्शनाखाली पोलीस हवालदार कलीम देशमुख करीत आहेत.
