खामगाव (बुलडाणा कव्हरेज न्युज) : खामगाव येथून इच्छादेवीच्या दर्शनासाठी निघालेल्या तरुणांच्या पल्सर दुचाकीचा भीषण अपघात झाला. मुक्ताईनगर–मलकापूर महामार्गावरील पिंपरी अकाराऊत शिवारात रविवारी दुपारी सुसाट वेगातील पल्सर अनियंत्रित होऊन थेट रस्त्याच्या दुभाजकावर आदळली. या अपघातात तीन तरुण गंभीर जखमी झाले आहेत.
पिंपरी गवळी (ता. खामगाव) येथील अजय विष्णूबड (वय २२), धीरज गणेश वामन इंगळे (वय २२) व मंगेश नरहरी बुंदे (वय २१) हे पल्सर दुचाकी (क्र. एमएच ५४–१४०६) ने मलकापूरकडून मुक्ताईनगरच्या दिशेने जात असताना चालकाचे नियंत्रण सुटल्याने अपघात झाला. धडकेची तीव्रता इतकी होती की दुचाकीचे मोठ्या प्रमाणावर नुकसान झाले.
अपघातानंतर तिन्ही तरुण रस्त्यावर रक्ताच्या थारोळ्यात पडले होते. स्थानिक तरुण व प्रवाशांनी माणुसकी दाखवत तात्काळ मदतीस धाव घेतली व जखमींना रस्त्याच्या कडेला हलवून प्राथमिक उपचार केले. तिन्ही जखमींना डोक्याला व पायाला गंभीर दुखापत होऊन मोठ्या प्रमाणात रक्तस्राव झाल्याचे समजते.
घटनेची माहिती मिळताच पोलिसांनी रुग्णवाहिकेला पाचारण केले. जखमींना प्रथम उपजिल्हा रुग्णालयात दाखल करण्यात आले, त्यानंतर पुढील उपचारासाठी खामगाव येथील खासगी रुग्णालयात हलविण्यात आले असून त्यांच्यावर उपचार सुरू आहेत.
