मानसिक त्रासाला कंटाळून तरुणाची आत्महत्या; प्रेयसी व तिच्या आईवर गुन्हा!

बुलडाणा (बुलडाणा कव्हरेज न्युज): तालुक्यातील मढ गावात राहणाऱ्या सागर सुदाम केदारे (वय २८) या तरुणाने मानसिक तणावाला कंटाळून विष प्राशन करून आत्महत्या केल्याची धक्कादायक घटना समोर आली आहे.

काय घडले?

सागरचे मागील दोन वर्षांपासून चिखली तालुक्यातील एका विवाहित महिलेशी प्रेमसंबंध होते. यामुळे त्याच्या वैवाहिक आयुष्यात वाद सुरू झाले होते.
सागरच्या वडिलांनी पोलिसांत दिलेल्या तक्रारीत नमूद केले आहे की, प्रेयसी आणि तिची आई त्याला तसेच त्याच्या पत्नीला सतत धमकावत असत.

• “पत्नीला सोड, नाहीतर तुझ्याच घरी येऊन फाशी घेईन,” अशी प्रेयसीची धमकी.
• “तुला जेलमध्ये टाकू,” अशी तिच्या आईची धमकी.
• या सततच्या मानसिक त्रासामुळे सागर तणावाखाली होता.

आत्महत्येचा निर्णय

२१ जुलै रोजी रात्री सागरने पत्नी पूजासह बाजारातून घरी आल्यानंतर, रात्री साडेनऊच्या सुमारास त्याने विष प्राशन केले.
त्याला तातडीने बुलडाणा, छत्रपती संभाजीनगर आणि नंतर नागपूर येथे उपचारासाठी हलवण्यात आले. मात्र, उपचार सुरू असतानाच ८ ऑगस्ट रोजी त्याचा मृत्यू झाला.

पोलिस कारवाई

या घटनेनंतर सागरच्या वडिलांनी धाड पोलिस ठाण्यात तक्रार दाखल केली.
पोलिसांनी प्रेयसी व तिच्या आईवर मानसिक त्रास देऊन आत्महत्येस प्रवृत्त केल्याप्रकरणी गुन्हा दाखल करून तपास सुरू केला आहे.