बुलडाणा (बुलडाणा कव्हरेज न्युज): छत्रपती संभाजीनगर शहरातील मिसारवाडी येथील व्यावसायिक शेख कदीर शेख करीम (वय ४२) यांचे अपहरण करून त्यांची निर्घृण हत्या करण्यात आल्याची धक्कादायक घटना समोर आली आहे. या घटनेने संपूर्ण परिसरात खळबळ उडाली असून, कुटुंबीयांवर दुखाचा डोंगर कोसळला आहे. रुईखेड मायंबा (ता. बुलडाणा) येथील एका विहिरीत त्यांचा मृतदेह आढळून आला. पोलिसांनी या प्रकरणी पाच जणांवर खुनाचा गुन्हा दाखल करून दोघांना अटक केली आहे.
काय घडले नेमके?
शेख कदीर हे मिसारवाडी येथे पत्नी, दोन मुली आणि एका मुलासह राहत होते. नारेगाव परिसरात त्यांचे जेसीबी आणि रोडरोलर दुरुस्तीचे गॅरेज होते. याशिवाय, ते अशा यंत्रांच्या कामांची कंत्राटेही घेत असत. ८ मे रोजी सायंकाळपासून ते अचानक बेपत्ता झाले. कुटुंबीयांनी त्यांच्या मोबाइलवर संपर्क साधण्याचा प्रयत्न केला, पण फोन बंद होता. रात्री उशिरा एका अनोळखी व्यक्तीने फोन उचलून कदीर यांचा मोबाइल जुई धरण फाट्यावर सापडल्याचे सांगितले. यामुळे कुटुंबीय हादरले आणि त्यांनी तातडीने चिकलठाणा पोलीस ठाण्यात तक्रार नोंदवली.
विहिरीत मृतदेह आढळला
रविवारी (११ मे) रुईखेड मायंबा येथील एका विहिरीत पाण्यावर मृतदेह तरंगताना गावकऱ्यांना दिसला. त्यांनी तात्काळ पोलिसांना माहिती दिली. पोलिसांनी मृतदेहाची तपासणी केली असता, त्याच्या खिशात मिसारवाडीतील एका मशिदीत देणगी दिल्याची पावती आढळली. या पावतीवरून मृत व्यक्ती ही शेख कदीर असल्याचे निष्पन्न झाले. मृतदेह कुजलेल्या अवस्थेत असल्याने हत्या ९ मे रोजी झाल्याचा पोलिसांचा प्राथमिक अंदाज आहे.
पोलिस तपासात धक्कादायक खुलासे
पोलिसांनी तपास सुरू केला असता, पाच जणांच्या टोळीने शेख कदीर यांचे अपहरण केल्याचे उघड झाले. या टोळीने त्यांना रुईखेड मायंबा येथे नेले. तिथे त्यांच्या डोक्यावर गंभीर वार करून आणि कपड्याने गळा आवळून त्यांची हत्या करण्यात आली. हत्या केल्यानंतर मृतदेह विहिरीत टाकण्यात आला. या प्रकरणात पोलिसांनी शेख अजीम शेख दरबार आणि रईस मिस्त्री यांना १२ मे रोजी रात्री उशिरा अटक केली. याशिवाय, शेख हकीम शेख दरबार (रा. पळसखेडा), अजहर साहेबलाल (रा. करमाड) आणि सिद्दीक युनूस शेख (रा. नारेगाव) यांच्यावरही खुनाचा गुन्हा दाखल करण्यात आला आहे.
व्यावसायिक वादातून हत्या
पोलिस तपासात समोर आले की, शेख कदीर आणि शेख अजीम यांच्यात व्यावसायिक वाद होता. यापूर्वी जानेवारी २०२५ मध्ये अजीमने आपल्या साथीदारांसह कदीर यांच्यावर हल्ला केला होता. त्या प्रकरणीही चिकलठाणा पोलिसांत गुन्हा दाखल झाला होता. तरीही अजीम संधीच्या शोधात होता. अखेर त्याने आपल्या साथीदारांसह ही थरारक घटना घडवून आणली. पोलीस निरीक्षक रविकिरण दरवडे यांनी सांगितले की, इतर फरार आरोपींचा शोध सुरू आहे.
महावितरणच्या अतिरिक्त सुरक्षा ठेवीमुळे बुलढाण्यातील ग्राहकांवर आर्थिक बोजा
शेख कदीर यांच्या हत्येने त्यांच्या कुटुंबाला मोठा धक्का बसला आहे. विशेष म्हणजे, आज (१३ मे) त्यांच्या मुलाचा दहावीचा निकाल आहे. आयुष्यातील या महत्त्वाच्या टप्प्यावर वडिलांच्या मृत्यूच्या बातमीने मुलासह संपूर्ण कुटुंब हादरले आहे. कदीर यांच्या पत्नी आणि मुलींवरही याचा आघात झाला आहे.
चिकलठाणा पोलिस या प्रकरणाचा सखोल तपास करत आहेत. मृतदेहाचे शवविच्छेदन अहवाल आणि इतर पुराव्यांच्या आधारे हत्येचा उलगडा होण्याची शक्यता आहे. फरार आरोपींचा शोध घेण्यासाठी पोलिसांनी विशेष पथके तयार केली आहेत.
या घटनेमुळे मिसारवाडी आणि परिसरात भीतीचे वातावरण पसरले आहे. पोलिसांनी नागरिकांना शांतता राखण्याचे आवाहन केले आहे.
1 thought on “मिसारवाडीतील व्यावसायिकाचे अपहरण अन् खून; रुईखेड मायंबा येथील विहिरीत सापडला मृतदेह”