बुलडाणा (बुलडाणा कव्हरेज न्युज): बुलडाण्यातील शेतकरी बांधवांसाठी महत्वाची बातमी! प्रधानमंत्री किसान सन्मान निधी योजनेचा 20 वा हप्ता जुलै 2025 मध्ये तुमच्या खात्यात येणार आहे. पण, जर तुम्ही ई-केवायसी आणि आधार सीडिंग पूर्ण केलं नसेल, तर हा लाभ मिळणार नाही. त्यामुळे ही कामं लवकरात लवकर करून घ्या.
बुलडाणा जिल्ह्यात सध्या 3,222 शेतकऱ्यांनी ई-केवायसी आणि 4,534 शेतकऱ्यांनी आधार सीडिंग केलेलं नाही. तसंच, तुमचं बँक खातं डायरेक्ट बँक ट्रान्सफर (DBT) साठी सक्षम असायला हवं. जर तुमचं बँक खातं नसेल, तर इंडिया पोस्ट पेमेंट्स बँकेत खातं उघडा आणि त्याला आधार लिंक करून DBT सुरू करा, असं कृषी विभागाने सांगितलं आहे.
या योजनेअंतर्गत केंद्र सरकारकडून वर्षाला 6,000 रुपये आणि महाराष्ट्र सरकारच्या नमो शेतकरी महासन्मान निधीमधून आणखी 6,000 रुपये, म्हणजेच एकूण 12,000 रुपये दरवर्षी शेतकरी कुटुंबाला मिळतात. पण हे पैसे मिळवण्यासाठी ई-केवायसी आणि आधार सीडिंग करणं गरजेचं आहे. नाहीतर हप्ता थांबेल.
काय करायचं? तुमच्या गावातल्या कृषी सहाय्यक, तालुका कृषी कार्यालय किंवा नोडल अधिकाऱ्यांशी संपर्क साधा. तुम्ही pmkisan.gov.in या वेबसाइटवर जाऊन तुमची नोंदणी तपासू शकता. जर नोंदणी क्रमांक हरवला असेल, तर आधार किंवा मोबाइल नंबरने तो मिळवता येईल.
जिल्हा कृषी अधीक्षक मनोजकुमार ढगे म्हणाले, “शेतकरी बांधवांनी वेळेत ई-केवायसी आणि आधार सीडिंग पूर्ण करावं, म्हणजे 20 वा हप्ता वेळेवर मिळेल.” कोणतीही अडचण आली तर जवळच्या कृषी कार्यालयात भेट द्या. चला, वेळ न घालवता ही कामं पूर्ण करा आणि योजनेचा लाभ घ्या!
