खामगाव (बुलडाणा कव्हरेज न्यूज): खामगाव तालुक्यातील नागापूर गावात आज, ११ जून २०२५ रोजी, एक हृदयद्रावक घटना घडली. स्वतःच्या शेतातील विहिरीत पाय घसरून पवन रमेश धानोरे या २० वर्षीय तरुणाचा दुर्दैवी मृत्यू झाला. ही घटना दुपारी साडेअकरा ते बाराच्या सुमारास घडली असून, या घटनेने संपूर्ण गावावर शोककळा पसरली आहे.
पवन रमेश धानोरे हा आपल्या शेतात पाणी आणण्यासाठी गेला होता. शेतातील विहिरीवर पाणी काढण्यासाठी गेले असताना अचानक त्याचा तोल गेला आणि तो थेट विहिरीत कोसळला. विहिरीच्या पाण्यात बुडाल्याने त्याचा जागीच मृत्यू झाला. या घटनेची माहिती गावकऱ्यांना समजताच परिसरात एकच खळबळ उडाली. हिवरखेड पोलिसांना तातडीने याची माहिती देण्यात आली. पोलिसांनी त्वरित घटनास्थळी धाव घेतली आणि त्याला विहरीतून बाहेर काढण्यात आले.
पवन हा नागापूर गावातील एक सामान्य कुटुंबातील तरुण होता. त्याच्या पश्चात त्याचे आई-वडील आणि एक लहान भाऊ असा परिवार आहे. कुटुंबाची आर्थिक परिस्थिती साधारण असून, शेती हाच त्यांच्या उदरनिर्वाहाचा मुख्य आधार आहे. पवन हा कुटुंबातील एक जबाबदार आणि मेहनती तरुण म्हणून गावात ओळखला जात होता. त्याच्या अचानक जाण्याने कुटुंबावर आणि गावकऱ्यांवर मोठा आघात झाला आहे. गावातील नागरिकांनी या घटनेमुळे तीव्र दुःख व्यक्त केले आहे.
हिवरखेड पोलिस या प्रकरणाचा अधिक तपास करत असून, पवन याच्या मृत्यूच्या कारणांचा शोध घेण्याचे काम सुरू आहे. या घटनेची नोंद अपघाती मृत्यू म्हणून पोलिस ठाण्यात करण्यात आली आहे.
