यवतमाळ (बुलडाणा कव्हरेज नेटवर्क): यवतमाळ शहरातील वंजारी फैल परिसरात एका भोंदू बाबाने मायलेकींना यातनागृहात डांबून अमानुष अत्याचार केल्याची धक्कादायक घटना उघडकीस आली आहे. गोपनीय माहितीच्या आधारे यवतमाळ शहर पोलिसांनी या भोंदूच्या घरावर छापा टाकला, तेव्हा तिथे आढळलेल्या भयावह परिस्थितीने पोलिसही हादरले. अल्पवयीन मुलीच्या तक्रारीनंतर पोलिसांनी भोंदू बाबा महादेव परसराम पालवे याच्याविरुद्ध बाल संरक्षण अधिनियम आणि जादूटोणा विरोधी कायद्यांतर्गत गुन्हा नोंदवला आहे. या घटनेने संपूर्ण यवतमाळ शहरात खळबळ माजली आहे.
खळबळजनक..! बेपत्ता विद्यार्थिनीने चुलत भावासोबत केल लग्न; चिखली तालुक्यातील घटना…
महादेव, जो माऊली या नावानेही ओळखला जातो, त्याने स्वतःच्या घरात बुवाबाजीचा अड्डा उघडला होता. त्याने एकट्या राहणाऱ्या एका महिलेला फसवले. तिच्यावर दृष्ट आत्म्याचा प्रभाव असल्याचे सांगून उपचाराच्या बहाण्याने तिला आपल्या घरी आणले. तिच्यासोबत तिची १४ वर्षीय मुलगी ही देखील या भोंदूच्या घरात राहायला लागली. शेजाऱ्यांनी पोलिसांना सांगितले की, सुरुवातीला या मायलेकी शारीरिक आणि मानसिकदृष्ट्या ठीक होत्या. मात्र, काही काळानंतर भोंदूने त्यांच्यावर आघोरी कृत्ये सुरू केली.
या मायलेकींना कैदेत ठेवण्यासाठी महादेवने घरात एक जीर्ण, पत्र्याची खोली तयार केली होती. या खोलीत त्यांना दिवस-रात्र कोंडून ठेवले जात होते. त्यांना लघुशंकेसाठीही बाहेर जाण्याची परवानगी नव्हती, आणि त्याच खोलीत त्यांना सर्व काही करावे लागत होते. उपचाराच्या नावाखाली महादेव गरम सळाखीने त्यांना चटके देत असे आणि मारहाण करत असे. पोलिसांना या मायलेकींच्या अंगावर मारहाणीच्या अनेक खूणा आढळल्या.
दुःखद घटना! पंढरपूर वारीत कवठळच्या तरुण वारकऱ्याचा हृदयविकाराने मृत्यू
पोलिसांनी तातडीने मायलेकींना शासकीय रुग्णालयात वैद्यकीय तपासणीसाठी दाखल केले. यावेळी त्यांच्यावर शारीरिक अत्याचार झाले असण्याची शक्यताही तपासली जात आहे. मुलीच्या तक्रारीच्या आधारे पोलिसांनी महादेवविरुद्ध कठोर कारवाई सुरू केली आहे. बाल संरक्षण अधिनियम आणि जादूटोणा विरोधी कायद्यांतर्गत गुन्हा दाखल झाला असून, पुढील तपास सुरू आहे.
या भयंकर घटनेने यवतमाळ शहरात संताप आणि भीतीचे वातावरण निर्माण झाले आहे. स्थानिक नागरिकांनी या भोंदूच्या क्रूर कृत्याचा तीव्र निषेध केला आहे. पोलिसांनी या प्रकरणाचा सखोल तपास सुरू केला असून, लवकरच पूर्ण सत्य बाहेर येईल, अशी अपेक्षा आहे.
