सोशल मीडियावर फेक अकाउंटचा सुळसुळाट; पोलिसांचा इशारा – सावधान राहा!

बुलडाणा (बुलडाणा कव्हरेज न्युज)
सोशल मीडियाचा वापर आज झपाट्याने वाढत आहे. फेसबुक, इन्स्टाग्राम, एक्स (ट्विटर) आणि व्हॉट्सअॅपसारख्या प्लॅटफॉर्ममुळे जग जवळ आलं असलं, तरी याचं काळं रूपही समोर येत आहे.
अलीकडच्या काळात फेसबुक आणि इन्स्टाग्रामवर बनावट (फेक) अकाउंट तयार करून अफवा पसरवणे, चुकीची माहिती देणे, प्रतिष्ठित व्यक्तींविरुद्ध बदनामीकारक पोस्ट टाकणे आणि काही वेळा आर्थिक मागण्या करणे अशा घटना वाढल्या आहेत. या डिजिटल फसवणुकीमुळे सामान्य नागरिक, अधिकारी आणि लोकप्रतिनिधी सगळ्यांच्याच सुरक्षिततेवर प्रश्नचिन्ह निर्माण झालं आहे.
शहर पोलीस प्रशासनाने याची गंभीर दखल घेतली असून, फेक अकाउंटधारकांविरुद्ध कठोर कारवाई केली जाईल, असा इशारा दिला आहे. तसेच, अफवा पसरवणे किंवा भडकावू मजकूर पोस्ट करणे हे सायबर गुन्हेगारीत मोडते, याचीही जाणीव करून दिली आहे.
सायबर तज्ज्ञ सांगतात की, “डिजिटल युगात जागरूकता हीच खरी सुरक्षा आहे.” त्यामुळे नागरिकांनी सोशल मीडियावर वैयक्तिक माहिती, फोटो किंवा आर्थिक तपशील शेअर करताना काळजी घ्यावी, तसेच संशयास्पद अकाउंट दिसल्यास त्वरित पोलिसांना कळवावे, असं आवाहन करण्यात आलं आहे.