शेतीला उद्योगाचा दर्जा द्या: शेतकऱ्यांना मिळणार आर्थिक स्थैर्य आणि नव्या संधी; पहा काय म्हणतात तज्ञ शेतकरी!

चिखली, (उध्दव पाटील- बुलढाणा कव्हरेज न्यूज): शेतीला उद्योगाचा दर्जा मिळावा, अशी मागणी गेल्या अनेक वर्षांपासून शेतकरी संघटना, कृषी तज्ज्ञ आणि सामाजिक कार्यकर्ते सातत्याने करत आहेत. शेती केवळ पारंपरिक उपजीविकेचा मार्ग न राहता, ती एक आधुनिक आणि शाश्वत व्यवसाय म्हणून विकसित व्हावी, यासाठी ही मागणी महत्त्वाची आहे.

शेतीला उद्योगाचा दर्जा मिळाल्यास शेतकऱ्यांना इतर उद्योगांप्रमाणे कर्ज, सवलती, अनुदान, विमा संरक्षण, आधुनिक तंत्रज्ञान आणि बाजारपेठेच्या सुविधा सहज उपलब्ध होतील. यामुळे शेतकऱ्यांचे उत्पन्न वाढेल आणि त्यांना आर्थिक स्थैर्य मिळेल, असा विश्वास कृषी क्षेत्रातील जाणकारांनी व्यक्त केला आहे.

शेतकऱ्यांच्या दिवसेंदिवस वाढत्या समस्यांवर पहा काय म्हणतात मंगरूळ येथील शेतकरी…

आधुनिक यंत्रसामग्री आणि नव्या तंत्रज्ञानाचा वापर शेतीत वाढल्यास उत्पादनक्षमता मोठ्या प्रमाणात वाढू शकते. याशिवाय, साखर, कापड, अन्न प्रक्रिया यांसारख्या शेतीवर अवलंबून असलेल्या उद्योगांना आवश्यक कच्चा माल वेळेवर आणि पुरेशा प्रमाणात मिळू शकेल. परिणामी, देशाच्या औद्योगिक विकासातही शेतीचा मोठा वाटा राहील.

शेतीला उद्योगाचा दर्जा मिळाल्यास कृषी पर्यटन, अन्न प्रक्रिया उद्योग आणि स्टार्टअप्स यांसारख्या नव्या संधी निर्माण होऊ शकतात. यामुळे ग्रामीण भागात रोजगाराच्या संधी वाढतील आणि शहरांकडे होणारे स्थलांतर कमी होण्यास मदत होईल.

नैसर्गिक आपत्तींमुळे शेतकऱ्यांना मोठ्या प्रमाणात नुकसान सहन करावे लागते. शेतीला उद्योगाचा दर्जा मिळाल्यास, उद्योगांना मिळणाऱ्या सुविधांप्रमाणे शेतकऱ्यांनाही नुकसान भरपाईची योग्य व्यवस्था उपलब्ध होऊ शकते, अशी आशा व्यक्त केली जात आहे.

सध्या ही मागणी शासन स्तरावर विचाराधीन आहे. मात्र, शेतीला चालना देण्यासाठी आणि शेतकऱ्यांचे जीवनमान सुधारण्यासाठी शेतीला उद्योगाचा दर्जा देणे ही काळाची गरज आहे, असे मत कृषी तज्ज्ञ आणि शेतकरी संघटनांनी स्पष्टपणे मांडले आहे.