बुलडाणा, (बुलढाणा कव्हरेज न्यूज): अढेरा पोलीस स्टेशनच्या हद्दीतील शेळगाव आटोळ शिवारात अवैध हातभट्टीच्या अड्ड्यावर पोलिसांनी मोठी कारवाई केली आहे. या कारवाईत सुमारे १ लाख ४५ हजार ७०० रुपये किमतीचा मुद्देमाल जप्त करून तो जागेवरच नष्ट करण्यात आला. ही कारवाई २२ जुलै २०२५ रोजी सायंकाळी ५:३० वाजण्याच्या सुमारास पार पडली.
सहाय्यक पोलीस निरीक्षक रूपेश शक्करगे यांच्या नेतृत्वाखालील पथकाने गुप्त माहितीच्या आधारे ही धाड टाकली. पेट्रोलिंगदरम्यान मिळालेल्या खबरीच्या माहितीनुसार, शेळगाव आटोळ येथील पाझर तलावाजवळ अवैध हातभट्टीचा अड्डा असल्याचे समजले. पथकाने तातडीने कारवाई करत या ठिकाणी छापा टाकला.
या कारवाईदरम्यान, रेणुका संजय मोरे आणि मिना किशोर वानखेडे (दोघीही शेळगाव आटोळ येथील रहिवासी) या दोन महिलांना अवैधरित्या मोठ्या प्रमाणात हातभट्टी तयार करताना आढळून आले. पोलिसांनी घटनास्थळावरून ४७ लोखंडी आणि प्लास्टिकच्या डब्यांमध्ये भरलेले एकूण ७०५ लिटर मोहासडवा जप्त केले. या मोहासडव्याची अंदाजे किंमत १ लाख ४१ हजार रुपये आहे, तर डब्यांची किंमत सुमारे ४,७०० रुपये आहे. एकूण मुद्देमालाची किंमत १ लाख ४५ हजार ७०० रुपये इतकी आहे. जप्त केलेला संपूर्ण साठा पोलिसांनी जागेवरच नष्ट केला.
या कारवाईत सहाय्यक पोलीस निरीक्षक रूपेश शक्करगे, पोलीस उपनिरीक्षक सुरेश जारवाल, पोलीस हवालदार सिद्धार्थ सोनकांबळे (क्र. ५५४) आणि चालक माधुरी इंगळे (मपोशि क्र. २१५८) यांचा समावेश होता. या प्रकरणात पुढील तपास सुरू असून, गुन्हा दाखल करण्याची प्रक्रिया सुरू आहे, अशी माहिती पोलिसांनी दिली.
अढेरा पोलीस स्टेशनच्या या कारवाईमुळे परिसरातील अवैध हातभट्टी व्यवसायाला मोठा हादरा बसला आहे. स्थानिक नागरिकांनीही पोलिसांच्या या तत्पर कारवाईचे स्वागत केले आहे.
