बुलडाणा (बुलडाणा कव्हरेज न्युज): शेतकऱ्यांच्या हक्कासाठी महाराष्ट्रात खणखणीत आवाज उठवणारे स्वाभिमानी शेतकरी संघटनेचे नेते रविकांत तुपकर यांचा एक सौम्य आणि संवेदनशील पैलू नुकताच समोर आला आहे. आंदोलनाच्या मैदानात सरकारला धारेवर धरणारे तुपकर यांनी आपल्या साहित्यप्रेमी व्यक्तिमत्त्वाची चुणूक दाखवत ‘नथ’ या कवितेचे सादरीकरण केले. ही कविता सध्या सोशल मीडियावर सर्वत्र चर्चेचा विषय ठरली असून, चाहत्यांकडून तिचे कौतुक होत आहे.
तुपकर यांनी आपल्या खास शैलीत सादर केलेल्या या कवितेने ऐकणाऱ्यांच्या मनाला स्पर्श केला. त्यांच्या या काव्यात्मक रूपाने सर्वांनाच आश्चर्याचा धक्का दिला. शेतकरी चळवळीतील आक्रमक नेते आणि कवितेतून भावनांना हात घालणारा कवी असा हा दुहेरी प्रवास अनेकांना थक्क करणारा आहे. ‘नथ’ या कवितेला मिळालेला प्रचंड प्रतिसाद हा त्यांच्या साहित्यिक संवेदनशीलतेची साक्ष आहे.
रविकांत तुपकर यांचे नाव आंदोलनकर्त्यापुरते मर्यादित नाही. गेल्या अनेक वर्षांपासून ते साहित्य आणि संस्कृतीच्या क्षेत्रातही सक्रिय आहेत. नवोदित कवींना प्रोत्साहन देणे, साहित्य संमेलनांचे आयोजन करणे, कविता आणि गझल सादर करणे यात ते नेहमीच पुढे असतात. त्यांचे साहित्यिक योगदान आणि शेतकरी चळवळीतील कार्य यांचा समतोल राखण्याची त्यांची हातोटी कौतुकास्पद आहे.
तुपकर यांचे व्यक्तिमत्त्व हे झुंजार आणि संवेदनशील अशा दोन बाजूंचा संगम आहे. शेतकरी, शेतमजूर आणि तरुणांच्या प्रश्नांसाठी रस्त्यावर उतरून लढणारा हा नेता आतून साहित्यप्रेमी आणि कलासक्त आहे. त्यांचे अनेक साहित्यिक, कवी आणि नाटककारांशी मैत्रीपूर्ण संबंध आहेत, जे त्यांच्या सांस्कृतिक कार्याला बळ देतात.
1 thought on “शेतकरी नेते रविकांत तुपकर यांचा अनोखा अंदाज: ‘नथ’ कवितेने जिंकली सर्वांची मने”