वाशी (बुलडाणा कव्हरेज न्युज): शेतकऱ्यांच्या कर्जमुक्तीच्या मागणीसाठी राज्यभर दौरे करणाऱ्या क्रांतिकारी शेतकरी संघटनेचे नेते रविकांत तुपकर यांच्या वाहनाला रविवारी (१८ मे २०२५) मध्यरात्री १२.३० ते १ वाजेच्या सुमारास वाशी तालुक्यातील पारगाव टोलनाक्याजवळ अपघात झाला. एका भरधाव ट्रकने त्यांच्या इनोव्हा गाडीला मागून जोरदार धडक दिली. सुदैवाने या अपघातात कोणतीही जीवितहानी झाली नाही. तुपकर पूर्णपणे सुरक्षित असून, गाडीतील दोन व्यक्तींना किरकोळ दुखापत झाली आहे.
हा अपघात नेमका कसा घडला, याबाबत सविस्तर माहिती अशी : रविकांत तुपकर यांची ‘लोकरथ’ ही इनोव्हा गाडी (क्रमांक MH 28 BQ 9999), जी त्यांना कार्यकर्त्यांनी लोकवर्गणीतून भेट दिली होती, ती पारगाव टोलनाक्यावर उभी होती. यावेळी साखरेने भरलेला एक ट्रक (क्रमांक MH 44 U 1444) भरधाव वेगाने आला आणि त्याने इनोव्हाला मागून धडक दिली. या धडकेचा आवाज इतका मोठा होता की परिसरात भीतीदायक वातावरण निर्माण झाले. ट्रकचालक संभाजी डोंगरे (रा. पंढरपूर) हा मद्यधुंद अवस्थेत होता, असे पोलिसांनी सांगितले.
या अपघातात गाडीच्या मागील सीटवर बसलेले तुपकर यांचे स्वीय सहाय्यक कार्तिक सवडतकर आणि सहकारी राजाराम जाधव यांना सौम्य दुखापत झाली. गाडीचा चालक अजय मालगे आणि सहकारी गजानन नाईकवाडे हे दोघेही सुदैवाने सुखरूप आहेत. अपघातानंतर ट्रकचालक संभाजी डोंगरे याने खोटी माहिती सांगून तपासात अडथळा आणण्याचा प्रयत्न केला, असे पोलिसांचे म्हणणे आहे. वाशी पोलिसांनी तातडीने घटनास्थळी धाव घेऊन ट्रकचालक आणि त्याच्यासोबत असलेल्या एका व्यक्तीला ताब्यात घेतले.
हा अपघात होता की नियोजित घातपात, याबाबत कार्यकर्त्यांमध्ये संशय व्यक्त केला जात आहे. यामुळे पोलिसांनी सखोल तपास सुरू केला आहे. वाशी पोलीस स्टेशनचे पोलीस निरीक्षक संग्राम थोरात यांच्या मार्गदर्शनाखाली तपास सुरू असून, ट्रकचालकाविरुद्ध भारतीय दंड संहितेच्या कलम २८१ (बेदरकार वाहन चालवणे) आणि मोटार वाहन कायद्याच्या कलम १८५ (मद्यधुंद अवस्थेत वाहन चालवणे) अंतर्गत गुन्हा दाखल करण्यात आला आहे. ही कायदेशीर प्रक्रिया सकाळी ५ वाजेपर्यंत सुरू होती.
रविकांत तुपकर सध्या शेतकऱ्यांच्या कर्जमुक्तीसाठी राज्यभर दौरे करत आहेत. नुकतेच त्यांनी नाशिक, परभणी आणि बीड येथील दौरे पूर्ण केले. रविवारी त्यांनी अंबाजोगाई तालुक्यातील देवळा येथे सभा घेतली आणि लातूर जिल्ह्यातील तांदुळजा येथे स्नेहभोजनाचा कार्यक्रम आटोपून जालना येथे निघाले होते. याचवेळी पारगाव टोलनाक्यावर हा अपघात घडला.
या घटनेनंतर राज्यभरातील शेतकरी कार्यकर्त्यांमध्ये एकच खळबळ उडाली. तुपकर यांच्या समर्थकांनी सोशल मीडियावर या घटनेचा तीव्र निषेध व्यक्त केला. तुपकर सुरक्षित असल्याचे समजताच कार्यकर्त्यांनी सुटकेचा निश्वास टाकला. क्रांतिकारी शेतकरी संघटनेने या अपघाताची सखोल चौकशी व्हावी, अशी मागणी केली आहे. कार्यकर्त्यांचे म्हणणे आहे की, तुपकर यांच्या आंदोलनामुळे काही शक्तींना त्रास होत असावा, त्यामुळे हा अपघात संशयास्पद वाटतो.
वाशी पोलिसांनी ट्रक आणि इनोव्हा गाडी ताब्यात घेतली आहे. ट्रकचालकाची वैद्यकीय तपासणी करण्यात आली असून, त्याच्या रक्तातील अल्कोहोलचे प्रमाण तपासले जाणार आहे. अपघाताच्या कारणांचा शोध घेण्यासाठी पोलिसांनी टोलनाक्यावरील सीसीटीव्ही फुटेज तपासण्यास सुरुवात केली आहे. तसेच, ट्रकचालक आणि त्याच्या सहकाऱ्याची कसून चौकशी सुरू आहे.
तुपकर यांचा संदेश
या अपघातानंतर रविकांत तुपकर यांनी कार्यकर्त्यांना संयम राखण्याचे आवाहन केले आहे. “मी पूर्णपणे सुरक्षित आहे. हा अपघात आमच्या आंदोलनाला खीळ घालू शकत नाही. शेतकऱ्यांच्या हक्कासाठी आमचा लढा सुरूच राहील,” असे त्यांनी सांगितले.
या घटनेमुळे बुलडाणा जिल्ह्यासह राज्यभरात चर्चेला उधाण आले आहे. पोलिसांच्या तपासातून या अपघातामागील खरे कारण समोर येईल, अशी अपेक्षा व्यक्त केली जात आहे.
