बुलढाणा (बुलढाणा कव्हरेज न्यूज): बुलढाणा तालुक्यातील मोहगाव येथे अतिक्रमण हटवण्याच्या कारवाईदरम्यान आज सकाळी मोठा गोंधळ उडाला. स्थानिक प्रशासन आणि पोलीस कर्मचारी गावातील अनधिकृत बांधकामे हटवण्यासाठी गेले असता, संतप्त गावकऱ्यांनी पोलिसांवर दगडफेक करत हल्ला चढवला. या हल्ल्यात राज्य राखीव पोलीस दलाचे (एसआरपीएफ) जवान नंदकिशोर उदावणे आणि पोलीस कॉन्स्टेबल राजेश मानकर गंभीर जखमी झाले. दोघांवर बुलढाणा येथील जिल्हा सामान्य रुग्णालयात उपचार सुरू असून, त्यांची प्रकृती स्थिर असल्याचे वैद्यकीय सूत्रांनी सांगितले. याशिवाय, आणखी काही पोलीस कर्मचारी किरकोळ जखमी झाले असून, त्यांच्यावर मोताळा येथील रुग्णालयात प्राथमिक उपचार करण्यात आले.
मोहगावातील अतिक्रमणाचा मुद्दा गेल्या काही महिन्यांपासून चर्चेत आहे. गावातील वस्ती विस्तार आणि अनधिकृत बांधकामांवरून गावकरी आणि प्रशासन यांच्यात तणाव वाढत आहे. यापूर्वीही गावकऱ्यांनी वस्ती विस्ताराच्या मागणीसाठी जिल्हाधिकारी कार्यालयासमोर आंदोलन केले होते. मात्र, आजच्या कारवाईदरम्यान परिस्थिती हाताबाहेर गेली. प्रशासनाने अतिक्रमण हटवण्यासाठी जेसीबी आणि पोलीस बंदोबस्तासह मोहगावात प्रवेश केला. यावेळी गावकऱ्यांनी आक्रमक होत प्रशासनाच्या कारवाईला तीव्र विरोध केला. काही गावकऱ्यांनी दगडफेक सुरू केली, तर काहींनी पोलिसांवर प्रत्यक्ष हल्ला चढवला.
या घटनेनंतर परिसरात तणावपूर्ण वातावरण निर्माण झाले आहे. पोलिसांनी संयम राखत परिस्थिती नियंत्रणात आणण्याचा प्रयत्न केला. अतिरिक्त पोलीस कुमक मागवून गावात शांतता प्रस्थापित करण्यात आली. मोताळा पोलीस ठाण्याच्या हद्दीत घडलेल्या या घटनेनंतर पोलिसांनी अज्ञात व्यक्तींविरुद्ध गुन्हा दाखल केला आहे. “पोलिसांवर हल्ला करणे हा अत्यंत गंभीर गुन्हा आहे. याप्रकरणी दोषींवर कठोर कारवाई केली जाईल,” अशी माहिती बुलढाणा जिल्हा पोलीस अधीक्षकांनी दिली.
या घटनेमुळे बुलढाणा जिल्ह्यात खळबळ उडाली असून, प्रशासन आणि गावकरी यांच्यातील तणाव आणखी वाढण्याची शक्यता आहे. पोलिसांनी गावात अतिरिक्त बंदोबस्त तैनात केला असून, पुढील कारवाईसाठी वरिष्ठ अधिकाऱ्यांशी चर्चा सुरू आहे. या प्रकरणाचा अधिक तपास मोताळा पोलीस ठाण्याचे प्रभारी अधिकारी करत असून, लवकरच दोषींना अटक केली जाईल, असे पोलिसांनी सांगितले.
