खामगाव (बुलडाणा कव्हरेज न्यूज): खामगाव तालुक्यातील गणेशपुर गावात एक धक्कादायक प्रकार उघडकीस आला आहे. येथील एका व्यक्तीच्या घरासमोर उभ्या असलेल्या दुचाकीला अज्ञात व्यक्तीने आग लावून ती पूर्णपणे जाळून खाक केली. ही घटना गणेशपुर गावातील वतन छगनराव मांडवे यांच्या घरासमोर घडली असून, याप्रकरणी हिवरखेड पोलीस ठाण्यात तक्रार दाखल करण्यात आली आहे.
वतन मांडवे (वय ४०, रा. गणेशपुर) यांनी दिलेल्या माहितीनुसार, त्यांचे घराचे बांधकाम सुरू असल्याने त्यांनी ४ ऑगस्ट २०२५ रोजी रात्री सव्वादहा वाजण्याच्या सुमारास त्यांची दुचाकी (क्रमांक: MH 28 BX 8422, अंदाजे किंमत एक लाख रुपये) घराच्या बाहेर, दारासमोर उभी केली होती. पहाटे चार वाजण्याच्या सुमारास कोणीतरी अज्ञात व्यक्तीने या दुचाकीला आग लावली. शेजारी राहणाऱ्या बाबुलाल रामचंद्र बछिरे यांनी जोरजोरात हाक मारून मांडवे यांना सांगितले की, “तुमची दुचाकी जळत आहे!” ही माहिती मिळताच वतन मांडवे आणि त्यांच्या पत्नीने तातडीने घराबाहेर येऊन पाहिले, पण तोपर्यंत दुचाकी पूर्णपणे जळून खाक झाली होती.
या घटनेमुळे गणेशपुर गावात खळबळ उडाली आहे. वतन मांडवे यांना संशय आहे की, कोणीतरी अज्ञात व्यक्तीने जाणीवपूर्वक त्यांची दुचाकी जाळली. या प्रकरणी त्यांनी हिवरखेड पोलीस ठाण्यात तक्रार नोंदवली आहे. पोलीस हवालदार विठ्ठल चव्हाण यांच्याकडून या घटनेचा पुढील तपास सुरू आहे. पोलिसांनी अज्ञात व्यक्तीविरुद्ध गुन्हा दाखल करून तपासाला सुरुवात केली असून, लवकरच या प्रकरणाचा उलगडा होईल, अशी आशा व्यक्त केली जात आहे.
