चिखली (बुलडाणा कव्हरेज न्यूज): चिखली येथील ब्रिटीशकालीन सार्वजनिक बांधकाम विभागाच्या विश्रामगृहाच्या इमारतीच्या पाडकाम प्रकरणाने आता नवे वळण घेतले आहे. या ऐतिहासिक इमारतीच्या दुरुस्तीसाठी जिल्हाधिकाऱ्यांनी तब्बल ८० लाख रुपयांचा निधी मंजूर केला होता. मात्र, सार्वजनिक बांधकाम विभागाच्या अधिकाऱ्यांनी कोणत्याही शासकीय परवानगीशिवाय रातोरात ही इमारत पाडल्याचा गंभीर आरोप चिखली तालुका आणि शहर काँग्रेस कमिटीने केला आहे. यासंदर्भात काँग्रेसने कार्यकारी अभियंत्यांना निवेदन देऊन परवानगी आणि संबंधित कागदपत्रे तातडीने उपलब्ध करून देण्याची मागणी केली आहे.
या प्रकरणाची सुरुवात तेव्हा झाली, जेव्हा जिल्हाधिकाऱ्यांनी विश्रामगृहाच्या दुरुस्तीसाठी मोठ्या रकमेची तरतूद केली. या निधीमुळे इमारतीचे जतन होऊन ती पुढील पिढ्यांसाठी सुरक्षित राहील, अशी स्थानिकांची अपेक्षा होती. परंतु, काँग्रेसच्या म्हणण्यानुसार, सार्वजनिक बांधकाम विभागाने कोणतीही लेखी परवानगी न घेता, केवळ तोंडी आदेशाच्या आधारे ही इमारत पाडली. याबाबत काँग्रेसने ३० जून रोजी चिखली येथील सार्वजनिक बांधकाम विभागाच्या कार्यालयात घेराव आंदोलनही केले होते. यावेळी उपविभागीय अभियंत्यांना विचारणा केली असता, त्यांनी तोंडी आदेशावर इमारत पाडल्याचे सांगून वेळकाढूपणा केल्याचा आरोप काँग्रेसने केला आहे.
३ जुलै रोजी चिखली तालुका आणि शहर काँग्रेस कमिटीने कार्यकारी अभियंता, सार्वजनिक बांधकाम विभाग, यांना निवेदन सादर केले. निवेदनात म्हटले आहे की, “चिखली येथील ब्रिटीशकालीन विश्रामगृहाच्या इमारतीच्या दुरुस्तीसाठी ८० लाखांचा निधी मंजूर झाला होता. यामुळे इमारत टिकवून ठेवता येईल, अशी आशा होती. परंतु, आपल्या विभागाने कोणतीही परवानगी न घेता ही इमारत पाडली. यासंदर्भात कोणती परवानगी घेण्यात आली आणि इतर संबंधित कागदपत्रे तातडीने उपलब्ध करून द्यावीत.” काँग्रेसने या प्रकरणी विभागाने केलेल्या कार्यवाहीचा तपशीलही मागितला आहे.
शेतकऱ्यांवर नवे संकट: रोहयांकडून शेतकऱ्यांचे अतोनात नुकसान; प्रशासन आणि वनविभागाचे दुर्लक्ष
यावेळी चिखली तालुका काँग्रेस कमिटीचे अध्यक्ष ,रामभाऊ जाधव, शहर अध्यक्ष राहुल सवडतकर, समन्वयक प्राध्यापक राजू गवई सर, डॉक्टर मोहम्मद इसरार, कुणाल बोंद्रे, प्राध्यापक निलेश गावंडे सर, रोहन पाटील, व्यंकटेश रिंढे यांची उपस्थिती होती. काँग्रेसने या प्रकरणी पारदर्शकता आणि जबाबदारीची मागणी केली असून, याबाबत पुढील कार्यवाहीकडे सर्वांचे लक्ष लागले आहे.
