चिखली (बुलडाणा कव्हरेज न्यूज): चिखली तालुक्यातील अमोना गावातील शेतकऱ्यांनी ३० जून २०२५ रोजी तहसील कार्यालयात तहसीलदार आणि तालुका कृषी अधिकाऱ्यांची भेट घेतली. यावेळी त्यांनी अतिवृष्टीमुळे झालेल्या पिकांच्या नुकसानीबाबत आणि न्यूजीवूड कंपनीच्या फसवणुकीमुळे झालेल्या आर्थिक हानीबाबत निवेदन सादर केले. शेतकऱ्यांनी या दोन्ही गंभीर समस्यांवर तातडीने कारवाई करून नुकसानभरपाई देण्याची मागणी केली आहे.
या निवेदनात शेतकऱ्यांनी सांगितले की, २६ जून २०२५ रोजी झालेल्या मुसळधार पावसामुळे सोयाबीन पिकांचे मोठ्या प्रमाणात नुकसान झाले आहे. सततच्या पावसामुळे पिके झोपली असून अनेक ठिकाणी सडून गेली आहेत. यामुळे शेतकऱ्यांना दुबार पेरणी करावी लागली, ज्यामुळे त्यांचे आर्थिक नुकसान वाढले आहे. या नुकसानीचा तात्काळ पंचनामा करून शेतकऱ्यांना योग्य नुकसानभरपाई द्यावी, अशी त्यांची आग्रही मागणी आहे.
शेतकऱ्यांनी न्यूजीवूड कंपनीवर गंभीर आरोप केले आहेत. कंपनीने काही शेतकऱ्यांना कपाशीचे प्लॉट लावण्यासाठी करार केला होता. शेतकऱ्यांनी मेहनतीने हे प्लॉट तयार केले, मात्र कंपनीच्या अधिकाऱ्यांनी अचानक फोन करून हे प्लॉट उपटायला सांगितले. यामुळे शेतकऱ्यांचे मोठे आर्थिक नुकसान झाले असून त्यांना त्यांच्या मेहनतीचा कोणताही मोबदला मिळालेला नाही. शेतकऱ्यांनी या फसवणुकीविरोधात कठोर कारवाई करण्याची मागणी केली आहे.
यासोबतच, शेतकऱ्यांनी २०२३-२४ या वर्षातील थकीत पिक विम्याची रक्कम तात्काळ त्यांच्या खात्यात जमा करावी, अशी मागणी केली आहे. पिक विम्याची रक्कम मिळण्यास विलंब होत असल्याने शेतकऱ्यांमध्ये नाराजी आहे. ही रक्कम मिळाल्यास शेतकऱ्यांना आर्थिक दिलासा मिळू शकेल, असे त्यांचे म्हणणे आहे.
शेतकऱ्यांनी स्पष्ट शब्दांत सांगितले की, जर त्यांच्या मागण्यांची तात्काळ दखल घेतली गेली नाही, तर ते व्यापक जनआंदोलन उभारतील. या निवेदनावर सिद्धेश्वर इंगळे यांच्या नेतृत्वाखाली संतोष जायभाये, दीपक वाघ, संजय वाघ, सुभाष ताठे, गजानन गावंडे, श्रीधर जगदाळे यांच्यासह अनेक शेतकऱ्यांनी सह्या केल्या आहेत.
शेतकऱ्यांच्या या मागण्यांवर प्रशासन काय कारवाई करते, याकडे सर्वांचे लक्ष लागले आहे.
