फायनान्स वर वाहन घेताना अशी होतेय फसवणूक, तुमची झालीय का?

Vehicle Showroom Frauds: मित्रांनो, कोणतेही वाहन खरेदी करणे म्हणजे एका नव्या स्वप्नाची पूर्तता! आपल्या मेहनतीने कमावलेल्या पैशातून आपले हक्काचे वाहन घरी आणण्याचा आनंद काही औरच असतो. पण जर मी तुम्हाला सांगितले की वाहन खरेदी करताना तुमची फसवणूक होते, आणि तीही तुमच्या नकळत, तर तुम्हाला आश्चर्य वाटेल का? दुर्दैवाने, अनेक ग्राहक याची कल्पना नसताना या फसवणुकीला बळी पडतात.

हो पण हे खरे आहे. वाहन घेताना बऱ्याच ग्राहकांची १००% फसवणूक झालेली असते. ते कसे आपण सविस्तर पाहूया. पण हि बातमी वाचल्यावर तुमच्या वाहनाचे सर्व बिल्स आणि कागदपत्रे नक्की तपासून पहा म्हणजे तुमची कशी फसवणूक झाली आहे हे तुम्हालाच कळेल!

रोख रकमेत वाहन खरेदी करताना फसवणूक कशी होते?

रोख रकमेत वाहन खरेदी करताना ग्राहकांची फसवणूक होण्याची शक्यता कमी असते, मात्र अनेक शोरूम मालक बिलिंग प्रक्रियेत घोळ करून ग्राहकांची दिशाभूल करतात.

सामान्यतः ग्राहकाला दिलेल्या कोटेशनप्रमाणेच रक्कम स्वीकारली जाते, पण नंतर दिलेल्या बिलामध्ये तफावत दिसून येते. ग्राहकाकडून घेतलेल्या संपूर्ण रकमेचे पक्के बिल दिले जात नाही. RTO फी आणि विमा (इन्शुरन्स) वगळता केवळ एक्स-शोरूम किमतीचे पक्के बिल दिले जाते. जर ग्राहकाने चौकशी केली, तर त्याला दुसरे कच्चे बिल दिले जाते, जे अ‍ॅक्सेसरीजचे असल्याचे सांगितले जाते.

या संदर्भात काही महत्त्वाचे मुद्दे:

• अ‍ॅक्सेसरीजसाठी पक्के बिल मिळत नाही असे सांगितले जाते, आणि जास्त शुल्क आकारून बिल अड्जस्ट केले जाते.
• काही वेळा, कंपनीकडून मोफत दिल्या जाणाऱ्या अ‍ॅक्सेसरीज ग्राहकाला दिल्या जात नाहीत किंवा बदलून स्वस्त दर्जाच्या अ‍ॅक्सेसरीज दिल्या जातात.
• ग्राहक जागरूक नसेल तर त्याच्याकडून अधिक पैसे उकळले जातात आणि त्याबदल्यात कोणतेही प्रमाणित दस्तऐवज दिले जात नाहीत.
• अशा अजून बऱ्याच गोष्टी असतात ज्या सामान्य ग्राहकाला सांगितल्या जात नाहीत.

ग्राहकाने घ्यावयाची काळजी

• कोटेशन आणि प्रत्यक्ष बिलाची तुलना करा – तुम्ही दिलेल्या संपूर्ण रकमेचे अधिकृत पक्के बिल मिळाले आहे का, हे तपासा. इतर शुल्क आकारले असेल त्याबद्दल विचारा.
• RTO आणि इन्शुरन्सची पावती घ्या – संबंधित शुल्क भरल्याचा पुरावा ठेवा.
• अ‍ॅक्सेसरीजसाठी पक्के बिल मागा – जर कोणत्याही अ‍ॅक्सेसरीजसाठी वेगळी रक्कम आकारली गेली असेल, तर त्याचे पक्के बिल मिळाले आहे का हे तपासा.
• कंपनीकडून दिल्या जाणाऱ्या सर्व सुविधा तपासा – वाहनासोबत मिळणाऱ्या सर्व गोष्टी तुमच्या ताब्यात आल्या आहेत याची खात्री करा. तसेच सर्व बिल एकत्र करून त्याची टोटल जुळत आहे का ते बघा.

फायनान्सवर वाहन घेताना होणारी फसवणूक

“५% किंवा १०% डाऊन पेमेंट भरा आणि वाहन घेऊन जा” अशा अनेक आकर्षक जाहिराती आपण पाहतो. फायनान्समुळे अनेक जण आपले वाहन घेण्याचे स्वप्न पूर्ण करतात, परंतु फायनान्स कंपन्या आणि शोरूम मालक मिळून अनेक वेळा ग्राहकांची मोठ्या प्रमाणात फसवणूक करतात. बऱ्याच वेळा फायनान्स कंपन्या त्यांना प्राधान्य द्यावे म्हणून शोरूम वाल्याना पैसे पण देतात, जे अप्रत्यक्षरीत्या ग्राहकाकडूनच वसूल केले जाते. हे समजून घेण्यासाठी एका प्रत्यक्ष उदाहरणावर नजर टाकूया.

फसवणुकीचा प्रकार

आमच्या एका मित्राला एका कंपनीची मोटारसायकल घ्यायची होती. तो शोरूममध्ये गेला आणि त्याला १,३०,००० रुपये एकत्रित किमतीचे कोटेशन देण्यात आले, ज्यामध्ये वाहनाची किंमत, RTO शुल्क, इन्शुरन्स, आणि इतर आवश्यक शुल्क समाविष्ट होते.

डाऊन पेमेंट आणि फायनान्स प्रक्रिया:

• मित्राने २५,००० रुपये डाऊन पेमेंट दिले.
• फायनान्स कंपनीने त्याला १,०५,००० रुपयांचे कर्ज मंजूर केले.
• फायनान्स कंपनीने ५,००० रुपये अतिरिक्त खर्च म्हणून “कर्ज फाईलिंग शुल्क” आणि “वैयक्तिक विमा” साठी वेगळे पैसे घेतले. जे गरजेचे नव्हते.
• अशाप्रकारे त्याने २५,००० रुपये रोख + १,०५,००० रुपये कर्ज = १,३०,००० रुपये भरले, शिवाय फायनान्सशी संबंधित ५,००० रुपये अतिरिक्त शुल्क ही वेगळे दिले.

फसवणूक कशी झाली?

काही दिवसांनी मित्राने आपला सिबिल स्कोअर तपासला, तेव्हा त्याच्या नावावर १,१२,००० रुपयांचे कर्ज दाखवले गेले होते. याचा अर्थ फायनान्स कंपनीने ७,००० रुपये अधिक कर्ज घेतले आणि त्याच्या नावावर विमा काढल्याचे सांगितले. पण या विम्याचे पैसे त्याने आधीच वेगळे भरले होते.

फसवणुकीचे विविध स्तर:

1. दुहेरी विमा:

• वाहन खरेदी करताना ५ वर्षांसाठी विमा शोरूमकडून घेतलेला असतो.
• तरीही फायनान्स कंपनीने त्याच्यासाठी वेगळा विमा काढला, जो अनावश्यक होता.
• IRDAI चे नियम (Free Choice of Insurance) इन्शुरन्स रेग्युलेटर IRDAI च्या मार्गदर्शक तत्त्वांनुसार, कोणत्याही ग्राहकाला त्यांच्या निवडीशिवाय इन्शुरन्स घ्यायला भाग पाडले जाऊ शकत नाही. स्रोत: IRDAI Official Website
• RBI चे नियम (Loan Protection Insurance जबरदस्ती करता येणार नाही) RBI Master Circular on Loans and Advances मध्ये नमूद आहे की कर्ज देताना बँका किंवा फायनान्स कंपन्या ग्राहकांना जबरदस्ती इन्शुरन्स विकू शकत नाहीत. स्रोत: RBI Official Website

 2. अनावश्यक कर्ज फाईलिंग शुल्क:

• फायनान्स प्रक्रियेसाठी ग्राहकांकडून फाईल चार्जेस आणि इतर शुल्क घेतले जाते, जे अनावश्यक आहे.
• या शुल्कांची कोणतीही स्पष्टता नसते आणि ती ग्राहकांकडून जबरदस्तीने घेतली जातात.
• Consumer Protection Act, 2019 ग्राहक संरक्षण कायद्यानुसार, कोणत्याही ग्राहकावर जबरदस्ती विक्री (Forced Selling) केली जाऊ शकत नाही.स्रोत: Consumer Protection Act, 2019

3. शोरूमने केलेली फसवणूक:

शोरूमने कोटेशनप्रमाणे सर्व गोष्टी दिल्या का, हे ग्राहकाला समजत नाही.

अ‍ॅक्सेसरीज, सवलती, आणि इतर सुविधांमध्येही अनेकदा कपात केली जाते.

म्हणजे या ग्राहकाची ७,००० रुपये अतिरिक्त कर्ज + अतिरिक्त घेतलेले ५, ००० रुपयाची फसवणूक झाली आहे.

ग्राहकांनी घ्यायची काळजी:

✅ फायनान्स घेताना कर्जाची रक्कम आणि परतफेडीचा हिशोब स्पष्ट करा.
✅ कर्जाचे सर्व करार आणि EMI हिशोब काळजीपूर्वक वाचा.
✅ दुहेरी विमा काढण्याची गरज आहे का, हे तपासा.
✅ फाईलिंग फी आणि इतर शुल्कांचा तपशील मागा आणि त्याचे अधिकृत बिल घ्या.
✅ शोरूमकडून घेतलेल्या प्रत्येक गोष्टीचे स्वतंत्र बिल मिळाले आहे का, याची खात्री करा.

यावरून एका मोटारसायकल खरेदीत १०,००० ते १२,००० रुपयांची फसवणूक झाल्याचे स्पष्ट होते. फायनान्स कंपन्या आणि शोरूम मिळून अशा प्रकारे ग्राहकांची दिशाभूल करतात. त्यामुळे वाहन फायनान्सवर घेताना प्रत्येक ग्राहकाने योग्य काळजी घेणे अत्यंत गरजेचे आहे.

जागरूक ग्राहक बना! आणि तुमच्या सोबत अशी कोणतीही फसवणूक झाली आहे का? तुमचा अनुभव आम्हाला कमेंटमध्ये जरूर कळवा! 🚗💰