मेहकर-चिखली मार्गावर भीषण अपघात: दुचाकीस्वार ठार, एक गंभीर जखमी

मेहकर (बुलडाणा कव्हरेज न्यूज): मेहकर-चिखली मार्गावरील उसरण फाट्याजवळ १६ मे २०२५ रोजी सकाळी भीषण अपघात घडला. यात दुचाकीस्वार मधुकर भगवान खेडेकर (वय ५५, रा. अंजनी खुर्द, ता. लोणार) यांचा जागीच मृत्यू झाला, तर त्यांचे सहकारी पुंजाजी महिफत काळे (वय ४५) गंभीर जखमी झाले आहेत. या अपघाताने परिसरात हळहळ व्यक्त होत आहे.

हा अपघात सकाळी ९ ते १० वाजण्याच्या सुमारास घडला. मधुकर खेडेकर आणि पुंजाजी काळे हे दोघे अंजनी खुर्द येथून पिंपळगाव उंडा येथे खासगी कामानिमित्त दुचाकीने (क्र. एमएच २८ – सीए ७७८१) जात होते. उसरण फाट्याजवळ पाठीमागून भरधाव वेगाने येणाऱ्या कारने (क्र. एमएच १९ ईपी २२१४) त्यांच्या दुचाकीला जोरदार धडक दिली. या धडकेत मधुकर खेडेकर यांचा जागीच मृत्यू झाला, तर पुंजाजी काळे यांना गंभीर दुखापत झाली. त्यांना प्राथमिक उपचारानंतर तातडीने छत्रपती संभाजीनगर येथील रुग्णालयात हलवण्यात आले आहे. सध्या त्यांच्यावर उपचार सुरू असून त्यांची प्रकृती चिंताजनक आहे.

मेहकर पोलिसांनी या प्रकरणी कारचालक वैभव रवींद्र विंचूरकर (वय २५, रा. वाघोळ, ता. रावेर, जि. जळगाव) याच्याविरुद्ध गुन्हा दाखल करून त्याला अटक केली आहे. पोलिसांनी दिलेल्या माहितीनुसार, कारचा वेग जास्त असल्याने हा अपघात घडला. पोलिसांनी घटनास्थळाचा पंचनामा केला असून पुढील तपास सुरू आहे.

मेहकर तालुक्यातील चायगाव येथे वीज पडून ७५ वर्षीय शेतकऱ्याचा मृत्यू: अवकाळी पावसाचा तडाखा!

मधुकर खेडेकर यांच्या मागे पत्नी आणि तीन मुली असा परिवार आहे. विशेष म्हणजे, त्यांचे लहान भाऊ प्रा. वसंत खेडेकर यांचाही १२ वर्षांपूर्वी असाच दुचाकी अपघातात मृत्यू झाला होता. या घटनेमुळे खेडेकर कुटुंबावर दुखाचा डोंगर कोसळला आहे. गावकऱ्यांनी या अपघाताबद्दल तीव्र संताप व्यक्त केला असून रस्त्यावरील वाहनांच्या बेदरकार वाहनचालकांवर कठोर कारवाईची मागणी केली आहे.

दुसरीकडे, अपघातात गंभीर जखमी झालेले पुंजाजी काळे हे अल्पभूधारक शेतकरी आहेत. त्यांच्यावर उपचारासाठी मोठा खर्च येत असून, कुटुंबावर आर्थिक संकट कोसळले आहे. स्थानिकांनी त्यांना मदत करण्याचे आवाहन केले आहे.

हा अपघात मेहकर-चिखली मार्गावरील वाहतुकीच्या समस्येकडे लक्ष वेधतो. या मार्गावर वारंवार होणाऱ्या अपघातांमुळे स्थानिक प्रशासनाने रस्ता सुरक्षेसाठी ठोस उपाययोजना कराव्यात, अशी मागणी नागरिकांमधून होत आहे.