संपादकीय, (बुलडाणा कव्हरेज न्युज): बुलढाणा जिल्ह्यातील रुईखेड टेकाळे या छोट्याशा गावात राहणाऱ्या वंदना बबन टेकाळे या एक सामान्य शेतकरी महिला. त्यांचं शिक्षण फक्त सहावीपर्यंत झालं, पण त्यांनी आपल्या मेहनतीने आणि कल्पकतेने एक यशस्वी उद्योजक होण्याचं स्वप्न पूर्ण केलं. आज त्या शेतकऱ्यांसाठी एक प्रेरणास्थान बनल्या आहेत. त्यांनी शेतीतील आव्हानांना संधीत बदललं आणि एक अनोखा व्यवसाय उभा केला.
शेतातील आव्हानं आणि एक नवी कल्पना
वंदना ताईंनी सुरुवातीला शेतात मजुरी करून आपला उदरनिर्वाह चालवला. पण शेतकऱ्यांना नेहमीच एका समस्येला तोंड द्यावं लागतं, बाजारात भाजीपाला विकताना योग्य भाव मिळत नाही. काही वेळा तर भाव इतके कमी असतात, की शेतकऱ्यांना आपला माल रस्त्यावर फेकून द्यावा लागतो. ही परिस्थिती वंदना ताईंना अस्वस्थ करायची. तेव्हा त्यांच्या डोक्यात एक साधी पण क्रांतिकारी कल्पना आली. का नाही आपण भाजीपाला सुकवून त्याची पावडर बनवावी आणि ती विकावी? ही कल्पना त्यांच्या आयुष्याला नवी दिशा देणारी ठरली.
साध्या पद्धतीने सुरुवात
वंदना ताईंनी आपला प्रवास अगदी साध्या पद्धतीने सुरू केला. सुरुवातीला त्या भाजीपाला उन्हात वाळवायच्या. पण काही काळ मेहनत आणि बचत केल्यानंतर त्यांनी “डिहायड्रेशन मशीन” विकत घेतलं. या मशीनच्या साहाय्याने त्यांनी कढीपत्ता, कोथिंबीर, टोमॅटो, कांदा, बटाटा यांसारख्या विविध भाज्यांचं डिहायड्रेशन करून पावडर बनवायला सुरुवात केली. या प्रक्रियेत कढीपत्ता आणि कोथिंबीर तीन तासांत सुकतात, तर टोमॅटो आणि बटाट्यांना 10 तास लागतात. सुकलेल्या भाज्यांना ग्लेंडरमध्ये बारीक करून पावडर तयार केली जाते आणि नंतर ती छोट्या-छोट्या पाकिटांमध्ये पॅक केली जाते.
व्यवसायाचा विस्तार आणि ग्राहकांचा विश्वास
वंदना ताईंच्या या पावडरला बाजारात चांगली मागणी मिळाली. त्यांनी ही उत्पादनं डॉक्टर, कार्यालयीन कर्मचारी आणि घरगुती ग्राहकांपर्यंत पोहोचवली. विशेष म्हणजे, त्यांच्या उत्पादनांमध्ये कोणत्याही प्रकारचे रसायन किंवा कृत्रिम पदार्थ वापरले जात नाहीत. यामुळे ग्राहकांचा विश्वास वाढला आणि त्यांचा व्यवसाय झपाट्याने वाढला. आज या व्यवसायातून त्यांना दरमहा किमान 40,000 रुपयांचं उत्पन्न मिळतं.
Monsoon 2025 Forecast: देशभरात सरासरीपेक्षा जास्त पाऊस; काही भागांत मात्र कमी पावसाची शक्यता
मूल्यवर्धनाचं महत्त्व
वंदना ताईंच्या मते, शेतकऱ्यांनी आपला माल वेळेवर विकला नाही, तर तो वाया घालवण्यापेक्षा त्याचं मूल्यवर्धन करणं हा अधिक चांगला पर्याय आहे. उदाहरणार्थ, एक किलो टोमॅटो सुकवून साधारण 100 ग्रॅम पावडर तयार होते. म्हणजेच एक किलो पावडरसाठी 10 किलो कच्चा माल लागतो. ज्या वेळी बाजारात टोमॅटोला भाव नसतो, त्या वेळी तयार केलेली ही पावडर चांगल्या दरात विकली जाते. यातून शेतकऱ्यांना तीन ते चार पट नफा मिळतो. ही पद्धत शेतकऱ्यांसाठी एक शाश्वत आणि फायदेशीर मार्ग ठरत आहे.
शेतकऱ्यांसाठी प्रेरणा (Women Empowerment Buldhana)
वंदना ताईंची कहाणी ही केवळ यशाची कहाणी नाही, तर ती बुलढाण्या जिल्ह्यातील शेतकऱ्यांसाठी एक प्रेरणादायी उदाहरण आहे. कमी शिक्षण आणि मर्यादित साधनं असूनही त्यांनी आपल्या मेहनतीने आणि नावीन्यपूर्ण विचारांनी एक यशस्वी व्यवसाय उभा केला. त्यांच्या या प्रवासातून शेतकऱ्यांना एक महत्त्वाचा संदेश मिळतो. शेतीतील आव्हानांना संधीत बदलून आपणही यश मिळवू शकतो.
वंदना ताईंचा हा प्रवास बुलढाणा जिल्ह्यातील प्रत्येक शेतकऱ्यासाठी एक नवा मार्ग दाखवतो. त्यांनी दाखवून दिलं की, मेहनत, जिद्द आणि योग्य दृष्टिकोन असेल, तर कोणतीही परिस्थिती यशस्वी होण्यापासून रोखू शकत नाही.
2 thoughts on “Women Empowerment Buldhana: शेतातून उद्योजकतेकडे, वंदना ताई टेकाळे यांची प्रेरणादायी कहाणी”